Neet te geluive – Vastelaovend in Finland
Boe waor ‘t ouch, örgens ind jannewarie in d’n oto nao ‘n Finse lès, wie veer mèt Willemijn ‘t gedach höbbe, tot veer toch eindelek eins Vastelavend en Carnaval zouwe mote goon viere. Drie daoge zouw teväöl zien, meh ‘nen aovend zouw toch mote kinne. Veer fletsde dees idee bij ‘t bestuur, meh zie dachte, dat veer bröl gewore waore. Vastelavond zouw inkel um te zoepe zien, goei d’n zaakske mer touw. ‘t Is evels väöl mier: same koume, dreufheid en plezeer, ‘ne lach en ‘n traon, verboonde zien, mèt us zinge, denskes passeren, effekes perbere alles te vergete, blijdsjap, sjoenkele en get knoevele. Vergaet neet te laeve, vergaet neet te lache.
Geine dee us get zeet. ‘t Bestuur zag, tot ‘t good waor. Veer kóste us neet rappelere, wienie of Vastelaovend oets in Finland gevierd waor. Willemijn plaotsde aonkóndeging op facebook en in d’n app. Gelökkeg waore dao lui, wie veer vroogte, wee of zin had mèt us te goon begaoje in eus Bliksemtent op d’n ierste miert. ‘t Kòs neet woer zien, geit ‘t dao ech gebäöre, hei in ‘t kaajd Finland, boe me inkel vräög heet euver de get langere däögskes? Gruuts op Willemijn, zie heet ‘t toch meh euvernuits gerangeerd.
Eimaol zo wiet, móste veer ouch leedjes höbbe. Geine Vastelaovend zoonder echte leedjes oet ‘t zuie. Dao mós helst mitgezoonge weure. Vaan ‘t Uulehat bis Oeteldonk, vaan Strienestad bis Mestreech, veer gónge ‘n sjoene playlist make. D’n aovend daoveur gónge Anna, Joris, Jurrian, Lizzy, Noëlle, Willemijn en iech ‘n leedjesfebrik ineinfitsele. Ierst same erwtesop ete en secijzebruudsjes bikke, daonao góng ‘t hei gaar loos. ‘t Doorde neet laangk, veurtot veer zeven mier es ach oor meziek in euze playlist hadde stoon en metein stoonte veer zelf bis deep in de nach te danse in de hoeskamer: Erwin, Fabrizio, Feestteam, Frans Theunisz, Gebroeders Ko, Guus Meeuwis, Hoondervel, Jan Biggel, John Tana, Lamme Frans, Marleen Rutten, Moerepetazie, Nachraove, Neet oét Lottum, Rempetemp, Rowwen Hèze, Saskia Theunisz, Shakin DJ’s, Sjeng de Belsj, Snollebollekes, Van Lieshout en Arts, #4Ton, Ziessjoem en nog väöl mier.
D’n zaoterdag gònge veer ‘t viere in eus Bliksemtent. Zoondag gông neet, es veer maondag nao eus werk touw móste. Veer hoofde neet väöl kemissies te doen, ‘t sjminkduuske waor al mét. In Kamppi waor ouch nog ein fieswinkel, dao nog gaw met Willemijn get versering gekoch, netuurlek in roed, geel en greun. Eimaol in d‘n kaffee eus kleier aongedoon en perbeerde veer de muziek. Helaas moch dee neet hel, umtot ‘t de Finnen daodoor de tent oet zouwe klipsere. Veer kóste toch neet inkel blieve klasjenere en kazele? Dus móste veer eweg en trök thoeskaome nao de Sallamandere Stare in Espoo. Twinteg lui in twie taxi, ‘nen oto en ‘ne fiets. Eimaol thoes gông ‘t loos. De benkskes en täöfelkes opzij. ‘t Bliksembeer en d’n wien in de keulkas. Veer zien begós. Noets gedach de Snollebollekes oets mèt nao links, noa rechts in mien volle hoeskamer gedans te zien weure. ‘t waor e super sjoen fieske. Hoondervel, nog ummertouw. Alaaf.
Prins John d’n twiede oet Mestreech
’t Mies en ’t helst métgezoonge leedje, woersjijnelek vaanwege de bitterballe en frikkedelle :
Daan kom iech mer aon (John Tana ft. Herriemenie Miserabe)
https://www.youtube.com/watch?v=fKbBDQCv_6Q
Crème Brûlee – Roquefort – Salade Niçoise
Paté – Gratin – Câteuneuf-du-Pape
Niks euversloon.
Daan kom iech mer aon.
Kiek miech neet raar aon.
Iche eet wat vaan diech is blieve stoon.
Iech wèl e desser veurtot iech gaon.
Daan kom iech mer aon.
Bitterballe vrete.
Iech hoof vaan giister niks te wete.
Al ‘t kaajd beer kump oet de kraon.
Daan kom iech mer aon.
Frikkedelle kawwe.
Maakt miech neet oet iech vreet zelfs lawwe.
Iech kin de drök eet mie weerstoon.
Daan kom iech mer aon.
De hoesarts zeet bewege.
Nao dat ‘r miech is koume wege.
Door miene boek kin iech neet stoon.
Daan kom iech mer aon.
Kleier die neet passe.
Dat zal diech zeker neet verrasse.
‘n Taofel mèt kies tot aon de maon.
Daan kom iech mer aon.
Daan kom iech mer get aon.
La vie drejt toch um ‘t ete.
Daan kom iech mer get aon.
Iech bin ‘t mörge toch weer vergete.
